ICC T20 World Cup News:
टी-20 विश्वचषकाच्या उपांत्य फेरीत
ऑस्ट्रेलियाची पाकिस्तानवर मात
अंतिम सामना ऑस्ट्रेलिया आणि न्यूझीलंडमध्ये रंगणार
Pckhabar- मार्कस स्टॉइनिस (Marcus Stoinis) आणि मॅथ्यू वेड (Matthew Wade) यांच्या जबरदस्त फटकेबाजीच्या जोरावर आयसीसी टी-20 विश्वचषकच्या (ICC T20 World Cup) दुसऱ्या सेमीफायनल सामन्यात ऑस्ट्रेलियाने (Australia) पाकिस्तान मात करत अंतिम सामन्यात धडक मारली. पाकिस्तानने दिलेल्या 177 धावांच्या लक्ष्याचा पाठलाग करताना कांगारू संघाने 19 षटकात विजय मिळवला. अंतिम सामन्यात ऑस्ट्रेलिया न्यूझीलंडशी (New Zealand) भिडणार आहे.
ऑस्ट्रेलियाच्या विजयात स्टोइनिस आणि वेडसह सलामीवीर डेविड वॉर्नर यांनीही महत्वपूर्ण भूमिका बजावली. स्टोइनिस 40 धावा तर वेड 41 धावा करून नाबाद राहिले. तसेच वॉर्नरने 30 चेंडूत 49 धावांची संयमी खेळी केली. दुसरीकडे, पाकिस्तानसाठी शादाब खानने (Shadab Khan) सर्वाधिक चार विकेट घेतल्या.
ऑस्ट्रेलियन कर्णधार आरोन फिंचने टॉस जिंकून पाकिस्तानला फलंदाजीने आमंत्रण दिले होते. पण फिंचचा तो निर्णय चुकीचा ठरला. पाकिस्तानने दिलेल्या आव्हानात्मक धावसंख्येचा पाठलाग करणाऱ्या ऑसी संघाने पहिल्याच षटकांत कर्णधार फिंचच्या रूपात पहिली विकेट गमावली. फिंच भोपळाही फोडू शकला नाही. त्यानंतर वॉर्नर आणि मिचेल मार्शने अर्धशतकी भागीदारी करून संघाचा डाव सावरला. दोघे संघासाठी घातक ठरत असताना शादाब खानने मार्शचा अडथळा दूर केला. त्यानंतर फलंदाजीला उतरलेला स्टिव्ह स्मिथ वॉर्नरला जास्त वेळ साथ देऊ शकला नाही आणि फक्त 5 धावांवर बाद झाला. ऑस्ट्रेलियाचा डाव एकहाती सांभाळणारा वॉर्नरही शादाब खानच्या गोलंदाजीवर बाद झाला. वॉर्नरने 49 धावा केल्या. स्टार अष्टपैलू ग्लेन मॅक्सवेलच्या अपयशाचे सत्र यंदा देखील सुरूच राहिले. खानने त्याला 7 धावांवर पॅव्हिलियनमध्ये धाडले. मार्कस स्टोइनिस आणि मॅथ्यू वेड यांनी जोडी जमवली आणि संघाच्या आशा पल्लवित ठेवल्या. मोक्याच्या क्षणी मॅथ्यू वेडने जबरदस्त षटकार खेचून संघाला विजयीरेष ओलंडून दिली. त्याला सामनावीरचा पुरस्कार देण्यात आला.
दरम्यान, 14 नोव्हेंबर रोजी जेतेपदासाठी ऑस्ट्रेलियाची गाठ न्यूझीलंडशी असेल. न्यूझीलंड संघाने आतापर्यंत जबरदस्त कामगिरी केली आहे. त्यामुळे अतिंम सामन्यात न्यूझीलंड क्रिकेट संघ की ऑस्ट्रेलिया संघ बाजी मारतो, हे पाहण्यासाठी क्रिडा रसिकांना उत्सुकता लागली आहे.
Leave a Reply