कोरोनाची रुग्णवाढ सप्टेंबरमध्ये स्थिर होत कमी होईल – आयुक्त श्रावण हर्डीकर
Pckhabar- पिंपरी-चिंचवड शहरात सप्टेंबरमध्ये ‘प्लॅटवू’ म्हणजेच रुग्णसंख्या स्थिर होण्यास सुरुवात होईल आणि रुग्णवाढ कमी होईल, असा अंदाज महापालिका आयुक्त श्रावण हर्डीकर यांनी व्यक्त केला आहे. शहरातील आजपर्यंतची रुग्णसंख्या 35 हजार पार झाली आहे.
पिंपरी-चिंचवड शहरात 10 मार्च रोजी कोरोनाचा पहिला रुग्ण आढळला होता. मार्च, एप्रिल आणि अर्धा मे महिना शहरातील रुग्णसंख्या नियंत्रणात होती. पण, 22 मे रोजी शहराला रेडझोनमधून बाहेर काढले होते. त्यानंतर रुग्णसंख्येत झपाट्याने वाढ झाली. जुन, जुलैमध्ये रुग्णसंख्येत मोठी वाढ झाली. ऑगस्टच्या पंधरवाड्यात रुग्णवाढीचा आलेख उंचावताच राहिला आहे.
ऑगस्टअखेर रुग्णसंख्या 55 ते 60 हजार होईल असा प्रशासनाचा कयास आहे. मागील काही दिवसांपासून दिवसाला एक हजारहून अधिक जणांचे रिपोर्ट पॉझिटीव्ह येत होते. वाढत्या रुग्णसंख्येमुळे शहराचा पुन्हा रेडझोनमध्ये समावेश करण्यात आला आहे.
‘सप्टेंबरपर्यंत ‘प्लॅटवू’ म्हणजेच रुग्णवाढ स्थिर होईल असा अंदाज आहे. त्यानंतर रुग्णसंख्या कमी होण्यास सुरुवात होईल. दररोजचा आकडा सातशे ते आठशेच्या आसपास राहील. पण, स्थिर होईल. मोठ्या संख्येने रुग्ण वाढणार नाहीत असा अंदाज आहे. रुग्णसंख्या कमी झाल्यास एक जम्बो रुग्णालय सुरु ठेवता येईल. त्यानंतर वायसीएम रुग्णालय नॉन कोविड रुग्णांसाठी सुरु करता येईल’, असे आयुक्त हर्डीकर यांनी सांगितले.
Leave a Reply